Nova fragmenta Euripidea in papyris reperta (Kleine Texte für Vorlesungen und Übungen 187)

Cum me nuper rogavisset J. Scherer vir optimus ut Euripidis Erecthei fragmenta nova ederem, haud ab re fore putavi si, priusquam ad comicos qui mihi magis sunt curae cordique redirem, omnes Euripidis reliquias his proximis annis inventas una cum fragmentis harum tragoediarum antehac cognitis in unum fasciculum colligerem. Ecce igitur, amice lector, Archelai Erecthei Cresphontis Cretum Oedipodis Telephi fragmenta omnia  ; in prima appendice inclusi, ne omnino neglectae iacerent, lacinias tenues Alcmeonis et A Icmenae, nec non et nova e florilegio Florentino fragmenta quae mihi hic edenda eximia benignitate concesserat V. Bartoletti ; altera appendix de fabularum argumentis quae papyris servata sunt perquam breviter te certiorem faciet.
Post tragicorum fragmentorum editionem alteram ab Augusto Nauck anno 1889 egregia cum industria atque doctrina coniectam tam immensa novorum versuum seges e fecundis Aegypti arenis ex improviso surrexit, ut hodie novae collectiones valde desiderentur. Aeschylea sane omnia nuper edidit H. J. Mette, sed in re lubrica atque incerta parum caute versatus spem criticorum fefellit. Sophoclea iam pridem recognovit A. C. Pearson commentariisque explanavit doctis et amplissimis : haud tamen inutile fuerit novum supplementum Sophocleum fragmenta papyracea continens. Trágicos minores propediem publicaturus est B. Snell. Qui vero hac aetate Euripidis reliquiis operam dare cupit, ei, ut omnem materiam ante oculos habeat, ad fontes complures adire necesse est. Initium ac fundamentum maxime necessarium iecit Nauck.